Polisieman vas wat glo sindikaat waarsku

ʼn Polisiebeampte van Port Elizabeth het Vrydag in die plaaslike landdroshof verskyn nadat hy na bewering ʼn sindikaat, wat mense se bankkaarte kloon, ʼn wenk gegee het dat die polisie ʼn lokval vir hulle gaan stel.

Lt. kol. Mhleli Dyonase (55), van die Algoa Park-polisiestasie, het vlugtig in die hof verskyn op ʼn aanklag van dwarsboming van die gereg.

Volgens die staat was Dyonase voorheen in diens van Valke, waar hy toegang tot inligting gehad het oor verdagtes wat betrokke was by bedrog, diefstal en ander onwettige aktiwiteite by verskeie kitsbanke. Die verdagtes het onder meer geld uit mense se rekeninge gesteel, waartoe hulle toegang gekry het deur hul bankkaarte te kloon.

Gedurende Oktober 2014 het die polisie ʼn lokval vir die verdagtes gestel en lede van die Valke, insluitende Dyonase, is aangesê om sekere kitsbanke in die stad dop te hou. Die doel was om Marinda Maseti en haar medepligtiges op heterdaad te betrap.

Foto’s van die verdagtes is vooraf vir Dyonase gewys sodat hy hulle by die kitsbanke kon identifiseer. Volgens die staat het Dyonase Maseti geken en het hy haar vooraf gebel en gewaarsku dat sy nie in die stad moet wees wanneer die operasie sou plaasvind nie.

Landdros Lise Keech het die saak tot 1 Maart uitgestel. Dyonase is op waarskuwing vrygelaat.